1 Corinthians 16
Maamuma fiirimep wi Yerusalem wia sesekomowa
1Aria wi Yeesus teeria Yerusalem-pa ikemik nain wia asipowa naep maamuma fiirimem-ikeman. Yo iiriw wi Yeesus teeria Galesia-pa ikemik nain wia maakemkun naap onamik. Ne nis pun naap akena onam-ikeka. 2Feenap, ni anane Sande-pa mua kui-kuisow maamuma-ko fiirimem-ikeka. Niena maamuma niar ikua nain urufap, kamin wuowa kookalep eliw wuam-ikeka. Maamuma naap fiirimem-ikaiwkin yo ikiwep niar fuuninen. Oko yo ikip fuunemkun ni maamuma fiirimowa kui-iraparowen. 3Ne aria wi mua wia urufap, mua ele-eliwiw wia pepekimep-pueka. Ikoka yo niar ikiwep fuunep amisa wiowa parosifa siisimep, parosifa nain maamuma onaiya wi wapena-pa wiar wuamkun wi Yerusalem wia pikiwomuk. 4Nain yo yena ikiwowa ikainon-na ikiwinen. Naapeya wia aawep unowiya ikiwiyen.Pol wi Korin wiar ikiwowa maek
5Aria yo ikoka Masedonia kame naap ikiwinen. Naap ikiwemi owowa kui-kuisow wi Yeesus teeria-pa ikemik nain wia urufap-puami ni niar ikiwinen. 6Niar ikiwep sande papako neeke niamiya ikainen. E ipia ne ewar epa nain puiya-na nia piipuinen-yon. Ne yo nia piipuap kaanek ikiwiyem nain nis-ke maa-ko efa asipiwkin ikiwinen. 7Aakisa yo ewur me niar ikiwinen. Oko ni niamiya ikok epa oko ikiwowa naep uufunemi epa maala niamiya me ikainen. Ikoka Mua Maneka ona era wuomeya-na yo niar ikiwep epa maala niamiya ikowa kookaliyem. 8Aria yo aakisa Efesus-pa feek iki-ikok Pentikos maapora urufap-puap ikiwinen. 9Moram owowa fain Yeesus opor eliwa wia maakowa nain era efar imenarek. Aakisa mua unowa opora efar miimimik. Makena, mua unowa yo uuwowa efar miatinep efa iiwuarimik, nain yo eliw momasia uuwam-ikainen.10Aria Timoti ikip niar fuuneya-na ni baliwep wueka. Naeya kema unu-unowa me wuinok. Os pun yiena Maneka uuwowa-pa ikua, yo uuwiyem naap. 11Ni naap me maeka, “O takira-ke, opora me wiar miimiyen,” naap me maeka. Ne o nia piipuinen naeya-na maa asipiwkin wueliwa nia piipuap kirep efar ekapinok. Moram o ikoka wi Yeesus teeria mua papako wiam aawep efar ekapikuan. Nain naep fan wia arep ikem.
12Aria yena uuwow epaskun Apolos-na wi Yeesus teeria mua papako ni niar ikiwimik nain wiamiya ikiwowa anane maakem-ikem. Nain o aakisa miatinek. Ikoka wiimar era imenap-na niar ikiwinen naek.
Yeesus teeria baliwep ikowa
13Ni maa uru-urufap, oko wakiowen. Ni opora opiman nain kekanep ikeka. Kema sonom maneka ikeka, kema me gariareka. 14Ne mua wia kookalep sira eliwa wia onam-ikeka.15Ni amisareman, ni Akaiya kame-pa Stefanas ne ona teeria onaiya, wi kiikir Yeesus teeria wiar ekamik. Wi teeria nain anane maneka Yeesus teeria mua papako wia saliwimik. 16Naapeya yo opor kekanowa nia maakiyem, wi mua sira naap nain wi emina-pa wiar ikeka. Ne mua papako kema epaskun wuami kekanep wiamiya uuwimik nain pun opora baliwep wia miimeka. 17Aria aakisa Stefanas, Fotunatus ne Akaikus, wiam arow efar ekapiwkin yo manek akena kemeliyem. Nis-ke ekapep kema efa iikirowowa nain me pepek, naapeya wis-ke ekapemi kema efa iikirowamik. Wi iiriw ni niamiya ikok kema nia iikirowamik, yo naap wia maem. Naapeya wi mua sira naap nain ekima wia opaka.
19Wi Yeesus teeria Esia kame-pa ikemik nain ni eliw ikeka nia naimik. Akuila Prisila ikos, ne Yeesus teeria anane wi koora-pa wiam fiirimimik nain, wis pun eliw ikeka nia naimik. 20Wi Yeesus teeria mua papako pun naap eliw ikeka nia naimik. Ne ni niam fiirimemi niam kookalemi sira eliwa-pa niam wueka. 21Aria opor ara fain yena wapen onaiya siisimiyem, ▼ yo Pol-ke, ni eliw ikeka nia naiyem. 22Mua eena yiena Maneka me kookaliya nain, Mua Maneka-ke iirareya epa samora-pa ikainon. Oo yiena Maneka, no ekape! 23Aria yiena Maneka Yeesus kema eliwa niinok. 24I unowiya Yeesus Krais teeria-pa ikemik, naeya yo nia kookaliyem.
Copyright information for
MHL